Анџелина Џоли се подготвува за голема животна промена. Откако сите нејзини деца станаа полнолетни, 51-годишната актерка планира да го напушти Лос Анџелес и дел од времето да го поминува на различни места низ светот. За своите планови таа зборуваше во ново интервју за „L’Officiel“.

Џоли е родена во Лос Анџелес, каде што ги одгледуваше и своите шест деца – Медокс (24), Пакс (22), Захара (21), Шајло (20) и близнаците Нокс и Вивиен (18).

Претходно таа изјави дека поради семејната ситуација по разводот со Бред Пит не можела да го напушти Лос Анџелес сè додека нивните најмлади деца не станат полнолетни. Сега, откако Нокс и Вивиен наполнија 18 години, таа пречка повеќе не постои.

Еден од најочигледните знаци дека се подготвува за заминување дојде во мај, кога го стави на продажба својот имот во населбата Лос Фелиз во Лос Анџелес за 29,85 милиони долари.

„За мене ова е крај на едно поглавје“, рече Џоли за промените што следуваат.

Заминувањето од Лос Анџелес, сепак, не значи дека актерката веќе избрала нова постојана адреса. Напротив, Џоли вели дека ја привлекува идејата да живее меѓу повеќе земји.

„Би сакала да имам дом за моето семејство, место каде што ќе стојат семејните фотографии и спомени. А потоа би сакала извесно време да бидам номад“, објасни таа.

Важна улога во нејзините планови ќе има Камбоџа, земја со која е поврзана повеќе од две децении. Таму има куќа, а најави дека повторно повеќе ќе се посвети на теренската работа и на својата фондација.

„Мојот дом во Камбоџа, исто така, неколку месеци годишно ќе служи како резиденција посветена на кмерската култура“, рече Џоли.

Актерката планира повеќе време да му посвети и на својот моден проект „Atelier Jolie“, кој сака да го прошири надвор од САД. По првата локација во Њујорк, една од следните би можела да биде во Бразил.

„Отсекогаш се надевавме дека Atelier ќе стане глобален. Бразил би можел да биде првата локација што ќе ја отвориме надвор од САД“, изјави таа.

Нејзината идеја е да патува во различни делови од светот и да соработува со локални уметници и креативци.

За Џоли, заминувањето од Лос Анџелес нема да значи едноставно преселување од еден град во друг, туку почеток на поинаков начин на живот – со повеќе патувања, престој во Камбоџа, хуманитарна работа и развој на сопствениот бренд во различни делови од светот.