Скопското инди-рок трио Милко се враќа на сцената со новиот сингл „Тажен понеделник” во издание на Шарла Рекордс. „Тажен понеделник” е снимена во студио Алшар, во период мај-јуни 2024 година.  Текстот и музиката се на Сашо Митревски, аранжманот е на Милко, продуцент е Ивица Јанкуловски. Покрај Сашо Митревски на гитара и вокал,  Филип Поповски свири бас гитара, Стефан Терпини – тапани и Владимир Бичковски –  сајзери.

Синглот го носи скопскиот урбан звук, кој плови низ морето купишта немирни води и ги истражува сите премрежија и кризи, низ мирен, а динамичен, поетски и музички автентичен стил. Низ суптилна симболика го раскажува моментот што се растегнува од минатото до сегашноста.

Ова е нивни прв сингл по петгодишна пауза. Музиката на Милко е инспирирана од британската независна музичка сцена од 80тите и 90тите години на минатиот век, и се карактеризира со изразито елегантен звук и топли, ангажирани, радио пријателски песни.

Искуството е нивниот снажен адут и тоа може да се почувствува во секој отсвирен тон. Гитарата и гласот на фронтменот Сашо Митревски звучат позрело од кога било, темите се поблиски до реалниот живот, во една одмерена и емоционално суптилна рефлексија на светот и времето во кое живееме.

Милко е инди-рок трио од Скопје. Постојат од 2008 година и во истата формација
досега реализираа пет изданија, три албумски и две ЕР изданија.

„Тажен понеделник” може да се преслуша на линкот.