Емо/пост-хардкор бендот Yöu оваа пролет оди на европска турнеја која опфаќа 13 концерти во осум земји во централна Европа и регионот.
Турнејата започнува на 15. мај во Скопје со концерт во Буква, на кој ќе настапи и кочанскиот бенд Корка, по што следува интензивен концертен циклус од 11 настапи во 11 дена низ Словенија, Италија, Германија, Австрија, Чешка, Хрватска и Србија.
Финалниот настап е закажан за 6 јуни во Битола, на главната бина на метал фестивалот под отворено небо, „Metal Discharge“. Турнејата, која опфаќа патување од над 5000 километри, е реализирана во соработка со Атомик продукција и Црнило букинг од Хрватска.
Формирани во октомври 2015 година во Скопје, Yöu ја темели својата музика на влијанијата од DC „Revolution Summer“ сцената, DIY етиката и сивото секојдневие. Нивниот звук претставува спој на традиционалнo емо со елементи на blackgaze и пост-метал, карактеризиран со динамични, но истовремено и мелодични гитарски линии, агресивен вокал и бескомпромисно цврста ритам секција.
Бендот го објави својот деби албум “We Sing The Blues…” во 2017 година, по што следеа настапи низ Европа и Балканот. Во 2024 година, по промена во составот, го издадоа EP-то “River of Sadness”, со кое го дефинираа актуелниот звук и правец. По серија фестивалски настапи и концерти во регионот, оваа турнеја претставува нивно враќање на европските сцени со нов материјал. Критиката ги опишува Yöu како бенд со интензивен и емотивно набиен настап, кој комбинира атмосферичност со сурова енергија. Меѓу другото, Abbadon Magazine (Србија) ги оценува како „брилијантен бенд“ со силно сценско присуство, додека The Platypus Zine (САД) го истакнува нивниот баланс помеѓу атмосферични градации и агресивен израз.
Датуми на турнејата: 15.05 – Скопје, Македонија – Буква 21.05 – Љубљана, Словенија – Menza pri Koritu 22.05 – Модена, Италија – Stella Nera 23.05 – Милано, Италија – GTA Gratosoglio
24.05 – Тубинген, Германија – Epplehaus 25.05 – Линц, Австрија – Willy*Fred 26.05 – Лајпциг, Германија – Connewitz 27.05 – Прага, Чешка – Eternia 28.05 – Брно, Чешка – Vegalite 29.05 – Загреб, Хрватска – AKC Attack 30.05 – Белград, Србија – Drugstore 31.05 – Нови Сад, Србија – CK13 06.06 – Битола, Македонија – Metal Discharge Open Air.
