Хидролозите од Управата за хидрометеоролошки работи предупредуваат дека доколку се остварат најавите на синоптичарите за врнежи со голем интензитет за кратко времетраење на одредени помали сливни површини, утре, па и следниот ден, можно е да дојде до поројни истекувања на помалите водотеци и суводолици и до несакани излевања на нивните води кои би можеле да предизвикаат локални проблеми како на крајбрежјето така и на патната инфраструктура која е во нивна близина. Според нив, на одредени места можна е и појава на свлечишта и одрони.

Во одредени градски населби можна е појава на локални проблеми поради брзото истекување на водите по улиците, а атмосферските води од олуците приклучени на канализациите можат да предизвикаат комунални проблеми.

Според најавата од синоптичарите при УХМР, утре под влијание на влажна и нестабилна воздушна маса времето на повеќе места ќе биде променливо облачно и нестабилно со пороен дожд, грмежи и засилен ветер. Локално процесите ќе бидат во форма на невреме со интензивен пороен дожд, силни електрични празнења, силен ветер и појава на град. Во четврток ќе има изолирана појава на пороен дожд и грмежи. .

Хидролозите од УХМР велат дека достапните модели најавуваат потреба од внимателност генерално на пределите, падините и рамнините околу планините Шар Планина, Јакупца, Караџица, Бистра, Баба, Ниџе, Кожуф, Стогово, Осоговието, Огражден и Малешевските Планини и препорачуват внимателно движење особено покрај реките и суводолиците поради можна појава на опасни води и свлечишта.