Технологии, енергетика, иновации и недвижности на едно место
Од 29 до 31 октомври, во Т Арена С.Ц. Борис Трајковски во Скопје, посетителите ќе можат да проследат презентации на технолошки решенија, хуманоидни роботи, проекти од секторот на недвижностите и стручни дискусии за технолошката и зелената трансформација.
– За два дена, на 29 октомври, во Т Арена С.Ц. Борис Трајковски во Скопје започнуваат меѓународните саеми ЕНЕРГО ТЕХНОМА 2026 и Саемот за недвижности РЕАЛ ЕКСПО 2026. Под мотото „Вклучи одржливи навики“, двата настана до 31 октомври ќе обединат компании, институции, експерти, инвеститори и млади иноватори, со програма посветена на новите технологии, енергетиката, одржливиот развој и недвижностите.
На брифингот за медиумите во пресрет на отворањето беше претставена саемската програма, која, покрај изложбениот дел, опфаќа стручни презентации, панел-дискусии, промоции на производи и услуги, деловни средби и можности за вмрежување. На изложбена површина од над 3.000 квадратни метри, посетителите ќе имаат можност да се запознаат со решенија од областа на роботиката, автоматизацијата, обновливите извори на енергија, циркуларната економија и дигиталната трансформација.
Свеченото отворање на двата саема е предвидено за 29 октомври, од 11:00 до 11:30 часот. Како почесни гости се најавени г-ѓа Сања Божиновска, министерка за енергетика, рударство и минерални суровини, и г-дин Стефан Андоновски, министер за дигитална трансформација.
Меѓу содржините на ЕНЕРГО ТЕХНОМА 2026 се издвојува претставувањето на хуманоидни роботи со словенечката технолошка компанија Hiproject. Посетителите ќе можат одблиску да се запознаат со овие технологии и да дознаат повеќе за нивната примена во реални работни средини, вклучително во индустријата, логистиката, фармацевтската индустрија, здравството и туризмот, изјави Даниела Глигоровска, извршен директор на Скопски Саем.
„Околу 40% од постојната работна сила ќе треба да се преквалификува за да остане конкурентна на пазарот на трудот. На глобално ниво, 90 милиони работни места ќе бидат изложени на трансформација, но новите технологии истовремено имаат потенцијал да отворат и 180 милиони нови работни места.
Македонските компании мора навремено да инвестираат во новите технологии, да развиваат конкурентни производи и услуги и да освојуваат нови извозни пазари. Промените се случуваат брзо и немаме време за одложување. Само со брза адаптација и проактивен пристап можеме да ја зајакнеме конкурентноста на нашата мала економија “, изјави Антони Пешев, извршен директор на Стопанската комора на Северна Македонија.
„Конкурентноста на домашната индустрија сè повеќе зависи од знаењето, иновациите и примената на новите технологии. Со конференцијата Manufacturing 2026 отвораме простор за поврзување на компаниите, институциите и експертите и за разговор за конкретните чекори кон попаметно, поефикасно и одржливо производство.“ изјави Марта Наумовска Грнарова, основач и претседател на Македонската асоцијација на метална и електро индустрија – МАМЕИ.
Важен дел од програмата ќе бидат и дискусиите за трансформацијата на економијата. Во фокусот ќе бидат можностите за модернизација на домашното производство преку вештачка интелигенција, роботизација и автоматизација, како и поврзувањето на технолошкиот развој со енергетската ефикасност и зелената транзиција. Ќе се разговара и за финансирањето на овие инвестиции, достапноста на зелените кредити и соработката меѓу институциите, компаниите и образованието.
Паралелно, Саемот за недвижности РЕАЛ ЕКСПО 2026 ќе ги обедини градежните компании, инвеститорите, агенциите и професионалците од секторот на недвижностите, кои ќе претстават актуелни понуди, инвестициски проекти и развојни иницијативи од Македонија и регионот.
Панел-програмата посветена на градежништвото и недвижностите ќе отвори прашања за примената на современите технологии и материјали, енергетската ефикасност, зелената градба и подготовката на квалификуван кадар. Дел од дискусиите ќе бидат посветени и на квалитетот на домувањето, движењата на пазарот, урбаната инфраструктура и заштитата на купувачите.
ЕНЕРГО ТЕХНОМА 2026 и РЕАЛ ЕКСПО 2026 ќе бидат отворени за посетителите од 10:30 до 18:30 часот во текот на сите три саемски дена. Двата настана нудат можност на едно место да се проследат технолошки новитети, да се разгледаат понуди и проекти и да се воспостават деловни контакти во областите на индустријата, енергетиката, градежништвото и недвижностите.
Партнери на саемите ЕНЕРГО ТЕХНОМА и Саемот на недвижности РЕАЛ ЕКСПО 2026 се словенечката технолошка компанија Hiproject и НЛБ Банка Скопје како финансиски партнер.
