– Министерот за одбрана на Србија, Милош Вучевиќ изјави дека безбедносната ситуација на северот на Косово се уште е високо ризична поради „едностраните, незаконски и нелегитимни одлуки на администрацијата во Приштина“.

„И да го наречеме со вистинското име – тоа е окупација на албанската администрација во Приштина“, изјави за весникот „Политика“ Вучевиќ. Тој рече дека Белград „стои зад фактот дека секогаш е подобро да се бара решение преку политички средства отколку да се влезе во конфликт“.

„Ќе видиме како Приштина ќе реагира на санкциите објавени од Вашингтон“, додаде тој.

Според него, српската армија останува на највисоко ниво на борбена готовност и „подготвена е да ја изврши секоја наредба и задача што ја добива од врховниот командант и претседател на Србија, Александар Вучиќ“.

„Нема да дозволиме да се премине црвената линија што значи пукање во нашиот народ, кон децата, конфискација на имотот и протерување од нивните домови. Се бориме политички и дипломатски и апелираме сите да се вразумат и влијание Курти да се повика на здрав разум “, потенцира Вучевиќ.