Бојкотот на продавниците организиран на последниот ден од јануари во Босна и Херцеговина во знак на протест против високите цени, според податоците на даночната управа, не ги даде очекуваните резултати, додека организаторите на акцијата најавуваат нови, подолгорочни мерки.

Официјалните статистички податоци покажуваат дека прометот во продавниците на 31 јануари бил еднаков или дури поголем од претходните денови. Според податоците на Даночната управа на Босна и Херцеговина, продавниците оствариле промет од 52,1 милиони евра, што е уште повеќе од претходниот ден кога изнесувал 51,9 милиони, а значително повеќе од пред една недела кога прометот бил 47,2 милиони евра.

И покрај неочекуваната статистика, организаторите на бојкотот не се откажуваат и најавуваат нови, подолгорочни акции кои имаат за цел да ги притиснат трговските синџири да ги намалат цените и да обезбедат пофер услови за потрошувачите. Планиран е повеќедневен бојкот, како и промовирање на алтернативни форми на купување производи директно од производителите и локалните трговци на мало. Така, за работните денови, од понеделник до петок, 6 февруари, организаторите ги повикаа граѓаните да ги намалат набавките, додека во петок, 7 февруари и сабота, 8 февруари, повикуваат на тотален бојкот на продавниците.