Мароканската влада предложи ревизија на законот за семејство со кој на жените ќе им се овозможи да го задржат старателството над децата по разводот и да стават вето на полигамијата во бракот, изјавија денеска министрите за правда и исламски прашања на земјата.

Министерот за правда Абделатиф Уахби изјави за новинарите дека се предложени повеќе од 100 амандмани, особено со кои им се дозволува на жените да ја забранат полигамијата во нивните брачни договори.

Ревидираниот закон, исто така, има за цел да ги поедностави и скрати постапките за развод, го прави старателството над децата заедничко право меѓу сопружниците и му дава право на секој сопружник да го задржи брачниот дом во случај на смрт на другиот, пренесува Ројтерс.

На разведените жени ќе им биде дозволено да го задржат старателството над своите деца по повторното венчавање, а законот ќе ги ограничи исклучоците за малолетнички бракови на 17 години, задржувајќи ја законската возраст за брак на 18 години.

Иако ревидираните закони не го укинуваат правилото за наследство засновано на ислам, кое на мажот му дава двојно поголем дел од жената, тоа им дозволува на поединците да подаруваат кој било дел од својот имот на женските наследнички.

Кралот Мохамед Шести, врховниот верски авторитет во земјата, во понеделникот рече дека ревидираниот законик, кој треба да биде доставен до парламентот на одобрување, треба да се заснова на „принципите на правда, еднаквост, солидарност и хармонија“.