Претседателот на Србија, Александар Вучиќ, во обраќањето до јавноста ги коментираше инцидентот во општина Зубин Поток и актуелната состојба на Косово и Метохија, наведувајќи дека во саботата бил извршен обид за „голем и жесток хибриден напад“ врз Србија.

– Вчера се соочивме со обид за сериозен хибриден напад врз нашата земја. Следевме внимателно што соопштуваа претставниците на Приштина, нивните меѓународни поддржувачи и медиумите, но речиси немаше факти во нивните тврдења – изјави Вучиќ на почетокот од своето обраќање.

Вучиќ објасни дека силна експлозија одекнала во реонот помеѓу селата Вараге и Угљара, во општина Зубин Поток. Инцидентот се случил на локацијата каде што се наоѓа каналот Ибар-Лепенац.

Според него, веднаш по експлозијата, на местото пристигнале припадници на косовската полиција, а подоцна и сили на КФОР.

Експлозијата предизвика оштетување на каналот Ибар-Лепенац, што доведе до прекин во снабдувањето со вода и струја во регионот на Грачаница и околните места.

– Истрагата ќе покаже кој е одговорен за експлозијата – додаде Вучиќ, нагласувајќи дека и српските, и косовските институции ја спроведуваат својата истрага за инцидентот.

Во своето обраќање, претседателот ги повика граѓаните да останат смирени, додека истрагата не утврди конкретни детали за причините и одговорните лица.

Овој инцидент доаѓа во време на веќе тензични односи меѓу Србија и Косово, а оштетувањето на виталната инфраструктура дополнително го усложнува секојдневието на граѓаните во регионот.