Редовната настава во неколку средни училишта во реонот на Сараево денеска повторно мораше да биде прекината откако добија закани за бомби, со што се потврди дека претходната полициска истрага и бројните апсења на малолетници не го решиле овој проблем кој интензивно трае веќе еден месец.

„Полицијата ги претресува училиштата, а за се е информирано обвинителството“, изјави Мерсиха Новалиќ, портпаролка на полицијата на Сараевската жупанија.

Ова е веќе четврта недела во која во училиштата во Сараево пристигнуваат закани за поставени бомби, па според утврдените процедури наставниот процес мора веднаш да се прекине и специјализирани полициски екипи да излезат на терен за да извршат увид. Сите извештаи досега се покажаа како лажни, но наставниот процес е загрозен, а повеќето училишта во такви ситуации прибегнуваат кон онлајн моделот на настава како што се практикуваше за време на пандемијата.

Заканите за бомби до училиштата најчесто доаѓаат преку е-пошта од лажни адреси или други онлајн платформи, а полициските истражители со недели трагаат по испраќачите, кои тешко можат да се пронајдат.

Досега, сепак, успеале да идентификуваат и приведат 12 такви лица. Само еден од нив бил полнолетен и имал 18 години, додека сите други биле малолетни.