Израелската армија денеска соопшти дека има интензивни борби со Хезболах во јужен Либан и ги предупреди граѓаните да не ги возат своите возила од северната област кон јужниот дел на земјата.

„Има интензивни борби во јужен Либан, во кои оперативците на Хезболах ја користат цивилната средина како жив штит за да се организираат за да извршат напади“, рече портпаролот на ИДФ Авичај Адре на платформата X.

Тој додаде дека движењето на возилата во правец север-југ, јужно од реката Литани, не се препорачува и дека предупредувањето важи до понатамошно известување, пишува The Times of Israel.

Израелската армија (ИДФ) денеска објави дека започнала ограничени копнени операции во јужен Либан против милитантната група Хезболах и инфраструктурата лоцирана долж северната граница на Израел, гаѓајќи ја инфраструктурата на Хезболах во бројни либански села долж границата кои претставуваат закана за израелските градови.