Воената управа на главниот град на Украина соопшти дека утринава над Киев биле соборени руски крстосувачки ракети „Искандер-К“.

Руските сили го нападнаа Киев од север, се наведува во соопштението и се додава дека тоа е петти ракетен напад овој месец врз главниот град на Украина, пренесе порталот на британскиот весник „Гардијан“.

Ракетите се уништени со средства за противвоздушна одбрана, а засега нема информации за уништување или евентуални жртви.

Во главниот град на Украина и во голем број источни и северни региони претходно беше издадено воздушно предупредување поради закана од ракетен напад.