Бројот на загинатите во Појасот Газа се искачи на повеќе од 40.000, објавија здравствените власти на палестинската енклава. Повеќе од 92.400 Палестинци се повредени од избувнувањето на војната во октомври 2023 година, според властите контролирани од исламистичката група Хамас.

Германската агенција дпа пишува дека овие бројки не можат да се потврдат и дека властите во енклавата не прават разлика меѓу убиени цивили и борци, но Франс прес пишува дека голем број агенции на Обединетите нации кои работат во Газа ги сметаат за веродостојни.

Дописниците на француската агенција се запознале со начинот на кој Министерството за здравство во Газа ги евидентира загинатите. Визуелно ги идентификуваат, со помош на член на семејството, пријател или пронајдени лични предмети.

Деталите за починатото лице, вклучувајќи име, пол, датум на раѓање и број на социјално осигурување потоа се внесуваат во дигиталната база на податоци на Министерството. Доколку телото не може да се идентификува, властите го внесуваат само бројот и сите достапни информации, како карактеристики кои би можеле да помогнат во подоцнежната идентификација, пишува Франс прес.

Канцеларијата за односи со медиумите на владата на Хамас претходно објави дека речиси 70 отсто од убиените се жени (околу 11.000) и деца (16.300).