Американскиот претседател Џо Бајден во интервју изјави дека неговиот претходник во Белата куќа, републиканскиот претседателски кандидат Доналд Трамп, е реална опасност за безбедноста на Америка доколку биде избран на 5 ноември.

„Слушајте ме внимателно. Ако победи на тие избори, гледајте што ќе се случи. Тоа е опасно. Тој е вистинска опасност за безбедноста на Америка“, изјави Бајден за „Си-би-ес“.

Бајден се повлече од претседателската трка и ѝ го отстапи местото на потпретседателката Камала Харис.

„Се наоѓаме на пресвртница. Навистина сме на пресврт… а демократијата е клучен елемент“, додаде Бајден во разговорот снимен пред неколку дена во Белата куќа.

Тогаш изгледаше подобро отколку на дебатата со Трамп на „Си-ен-ен“ на 27 јуни.

„За време на таа дебата имав навистина, навистина лош ден бидејќи бев болен, но немам никакви сериозни здравствени проблеми“, изјави тој на новинарот на „Си-Би-Ес“ на прашањето за тоа.

Три недели по неговиот катастрофален настап во дебатата, Бајден на 21 јули објави дека се повлекува од изборната трка.