Директорот на Бирото за јавна безбедност Александар Јанев на својот фејсбук профил најави дека со дронови ќе се ловат лицата кои ги подметнуваат пожарите.

„Денес со дел од мојот тим излеговме на терен во месноста „Буково“, на тромеѓата помеѓу село Расино, с.Косел и с.Опејнца, каде активно гори борова шума.Од лице место, за жал, мора да констатирам дека е зафатен поголем дел од борова шума и згрозен сум од апокалиптичните сцени на опожарените места. Во исто време, сакам да им се заблагодарам на пожртвуваноста на сите вклучени чинители во справувањето со огнената стихија“, објави Јанев на својот фејсбук профил.

Тој истакна голема благодарност и за ангажираноста и посветеноста на хеликоптерските единици при МВР и МО, без чија воздушна поддршка не може да се стават под контрола пожарите, заради тешко пристапните терени.

„Апелирам до граѓаните! Внимавајте кога се движите по шумите, по нивите, полињата, сепак, општото здравје и човечките животи се нешто најскапоцено, а подметнувањето на пожари е еколошки криминал од највисок степен!, Денес најавувам ангажирање на сите расположливи дронови, кои ќе бидат во функција 24 часа, заедно со термалните камери, заради откривање на можни сторители-подметнувачи на пожари“, посочи Јанев.