Институтот за јавно здравје денес прави проверка на исправноста  на реагенсите за откривање голем број заразни болести откако вчера попладне вработените открија дека е исклучена струјата во фрижидерите во кои се чуваат. В.д. директорката Марија Андоновска, се сомнева дека се работи за диверзија, но случајот е пријавен кај истражните органи и остава тие да утврдат што точно се случило и колку време фрижидерите биле исклучени.

Таа денес, пред да објасни што се случувало вчера во Институтот, нагласи дека поминале само пет дена откако е назначена на функцијата во кои се обидува да утврди како функционира институцијата, да ги открие недоследностите за да може да се надминат.

Вчера, по истекот на работното време некои од вработените ја известиле дека е исклучена струјата на фрижидерите со реагенси сместени во посебна соба на одделот бактериологија, за кои осигурувачите се во ходник низ кој поминуваат сите вработени.

„ При самото доаѓавме констатиравме дека се исклучени директно од осигурувачите. Има две разводни табли во тој ходник, а таму поминуваат сите кои што работат во овој дел. Овие две разводни табли, каде што беше исклучен осигурувачот, се разводни табли каде што има стотина и стотина осигурувачи. Беа спуштени само оние кои се поврзани со фрижидерот. Дали е случајно или намерно јас не можам да знам, јас само го констатирам и ја информирам јавноста за тоа. Ние случајот уште во текот на вчерашниот ден го пријавивме до надлежните институции и јас искрено верувам дека тие ќе си ја завршат својата работа и ќе констатираат дали ова е навистина диверзија или е случајност“, вели директорката Андоновска.

Во Институтот денес реагенс по реагенс проверуваат дали има оштетувања оти не знаат со сигурност колку време била исклучена струјата во фрижидерите. Директорката најави дека во текот на денот ќе објави официјален стручен извештај во кој ќе биде наведена исправноста на реагенсите, количината на реагенси како и се она што го детектираат.

Од она што директорката Андоновска успеала досега да го види, во исклучениот фрижидер се чувале и реагенсите за откривање голема кашлица за кои таа веќе алармираше дека ги има малку, со оглед на тоа што имаме прогласена епидемија на голема кашлица.