Помина повеќе од еден месец откако повеќе од 50 заложници киднапирани од Хамас во нападот на 7 октомври беа ослободени за време на прекинот на огнот, но Алон Охел, 22-годишен маж кој има српско и израелско државјанство, не беше меѓу нив. Неговото семејство се уште не се откажува од потрагата и одбива да размислува за најлошото.

Мајката на Алон, Идит Охел, за „Блиц“ вели дека верува дека нејзиниот син е жив и открива дека израелската влада и српската амбасада во Израел работат на неговото враќање, но дека се уште не знае каде е Алон и дали е жив.

„За жал, не знам ништо за него, ниту каде е, ниту дали е жив. Многу ми е тешко, но чувствувам дека е жив и пак ќе го гушнам. Владата на Израел мора да стори повеќе, да бара да се ослободат заложниците, да престане огнот и да престане војната и сите затвореници да дојдат кај нивните семејства. Помина предолго од првиот прекин на огнот! Алон Охел, како и сите заробени, е само цивил, обичен граѓанин кој отишол на забава и бил брутално киднапиран“, вели загрижената Идит Охел за „Блиц“.

Идит пред повеќе од еден месец проговори за агонијата низ која поминува со семејството по киднапирањето. Сега таа вели дека стравува дека светот полека заборава на заложниците киднапирани од Хамас.

„Празници има насекаде во светот. Во Израел нема празници, во воена состојба сме, сите се плашиме. Се плашам дека светот заборави на заробените луѓе што ги киднапира Хамас поради празници, новогодишни, божиќни и одмори“, вели Идит Охел за „Блиц“.