Командантот на израелската армија Херзи Халеви одби да го коментира нападот во кој загина советник на иранската Револуционерна гарда во Сирија, но рече дека израелските сили оперираат низ целиот регион.

„Нема да коментирам за различните активности што ги преземаме. Израелските одбранбени сили (ИДФ) оперираат со други безбедносни организации низ Блискиот Исток, во и околу границите на земјата“, изјави Херзи Халеви за новинарите.

Началникот на Генералштабот на ИДФ додаде дека Израел „ги презема сите неопходни активности за јасно да покаже дека е решен да ја брани земјата и дека е подготвен да оди далеку“.

Во израелски воздушен напад пред сирискиот главен град Дамаск, во понеделникот е убиен Сејед Рази Мусави, висок советник во иранската Револуционерна гарда, соопштија три безбедносни извори и ирански државни медиуми.

Мусави беше одговорен за координација на воениот сојуз меѓу Сирија и Иран, а Револуционерната гарда рече дека Израел ќе страда за неговото убиство.