Германската министерка за надворешни работи Аналена Баербок ја повтори посветеноста на нејзината земја за континуирана поддршка за Украина, велејќи дека рускиот претседател Владимир Путин има намера да ја уништи земјата по руската инвазија почната пред речиси две години.

„Факт е дека првичниот план на Путин да го заземе Киев и да убие, раселува или потчини повеќе од 40 милиони луѓе не беше успешен поради неверојатната храброст на Украинците кои се решени да ја бранат својата земја“, рече Баербок во интервју за германскиот весник Potsdamer Neusten Nachrichten.

„И тоа е благодарение и на нашата поддршка, како и на поддршката на многу други земји, кои го прават она што е човечко: и помагаат на жртвата, наместо да замижуваат, што би му помогнало на агресорот“, додаде министерката.

Сегашната ситуација на териториите под руска окупација и незаштитените локации во Украина покажува што ќе се случеше со целата земја, како и со соседните земји како Молдавија, доколку Европската унија и мнозинството од меѓународната заедница не застанеа цврсто на страната на Украина, според Баербок.

„Путин намерно ги напаѓа електраните, центрите за дистрибуција на електрична енергија и далноводите, така што водоснабдувањето да замрзне на минус 10 степени Целзиусови, а луѓето да умираат од жед и смрзнуваат до смрт. Тој сака да ја уништи Украина и затоа ќе ја поддржуваме се додека е потребно“, предупреди таа.

Германија е еден од главните помагачи на Украина во конфликтот. Според вкупната вредност, Берлин беше вториот најголем снабдувач на воена помош за Украина зад Соединетите држави, вклучувајќи борбени тенкови, тешка артилерија и системи за воздушна одбрана.