Палестинските христијани денеска одржаа мрачно божиќно бдение во Витлеем, пеејќи песни на свеќи и молејќи се за мир во Газа наместо вообичаените прослави на местото каде што веруваат дека е роден Исус Христос.

Витлеем има централно место во христијанската традиција за животот на Исус, според која тој е роден во штала бидејќи во гостилницата немало место за неговите родители.

И 2.000 години подоцна, верниците се собираат на локацијата на таа традиционална штала во базиликата Рождество на Исус од византиската ера во Витлеем, каде што обично има радосни божиќни прикази и осветлени дрвја на плоштадот Рождество.

Но, не и оваа година поради војната во Газа. Во жалост е и мнозинското палестинско население во Витлеем на окупираниот Западен Брег.

Годинава решија да слават без големиот бор, вообичаениот центар на божиќната прослава во Витлеем, бидејќи на само 50 километри се случува масакрот.

Црквите во Витлеем годинава поставија макети на згради во урнатини и бодликава жица во знак на солидарност со жителите на Газа.

“Витлеем е порака. Тој не е град, тоа е порака за мир до целиот свет. Од ова свето место пренесуваме порака за мир… Стоп за војната, прекинете го крвопролевањето, убиствата и одмаздата”, о. – рече Ибрахим Фалтас на бдението.

Христијаните сочинуваат околу 2 отсто од населението низ Израел и окупираните палестински територии, според здружението Христијани за заштита на Светата земја, кое е основано од поглаварите на црквите во Ерусалим, а има помал дел од христијаните во Газа исто така.

Војната предизвикана од нападите на Хамас врз израелските градови на 7 октомври, во кои Израел вели дека загинаа 1.200 луѓе, главно цивили, ги одврати повеќето од очекуваните странски туристи кои се надеваа да го прослават Божиќ во Витлеем.