Вечерва израелската армија ја потврди смртта на петмина заложници во Појасот Газа, изјави воениот портпарол Даниел Хагари, додавајќи дека нивните семејства се информирани.

„Во изминатите денови израелската армија и полиција ги информираа семејствата на петте заложници за нивната смрт“, рече Хагари.

Смртта на заложниците е потврдена по истрагата и врз основа на разузнавачки информации, објасни портпаролот на брифингот за новинари, пренесе агенцијата Франс прес.

Тој оцени дека благодарение на воената операција телото на еден од тие заложници било донесено во Израел.

Во кибуцот Нир Оз, кој беше тешко погоден од нападите на Хамас на 7 октомври, беше кажано дека меѓу загинатите има тројца негови жители, меѓу кои и најстариот заложник, 86-годишен маж.

Од почетокот на прекинот на огнот во војната меѓу Хамас и Израел на 24 ноември, ослободени се повеќе од 100 заложници.

Според израелските власти, во Газа сè уште се приведени 115 возрасни мажи, 20 жени и две деца, пренесе АП.