Околу 21.000 луѓе денеска учествуваа на пропалестинските протести во Брисел, соопшти полицијата, а многумина извикуваа слогани како „Слободна Палестина“ и повикуваа на прекин на огнот во Појасот Газа, марширајќи мирно низ градот.

„Она што се случува во Газа сега е повеќе од застрашувачко“, рече еден демонстрант, носејќи транспарент на кој пишуваше „Веднаш прекин на огнот!“ на холандски.

Други демонстранти држеа транспаренти на кои пишуваше „Стоп за геноцидот“, „Човекови права за Палестина“ и бараа апсење на израелскиот премиер Бенјамин Нетанјаху за воени злосторства.

„Важно е нашиот глас да се слушне, да не прифатиме да се бомбардираат и убиваат луѓе“, рече друг демонстрант.

Од нападот на Хамас на југот на Израел на 7 октомври, има силна поддршка и симпатии за Израел од западните влади и од многу граѓани, наведува Ројтерс. Но, воениот одговор на Израел, исто така, предизвика бес, при што демонстрантите ширум светот повикаа на прекин на огнот.