Шефот на израелската безбедносна агенција „Шин Бет“ вели дека тој е лично одговорен за недостигот на рано предупредување за нападот на Хамас врз Израел.

„И покрај низата акции што ги изведовме, за жал, не успеавме да генерираме доволно предупредување што би овозможило да го спречиме нападот. Одговорноста е моја бидејќи јас сум на чело на организацијата. Ќе има време за истраги. Сега се бориме“, напиша Ронен Бар во порака до членовите на агенцијата.

Локалните медиуми објавија дека неколку часа пред нападот на 7 октомври, одбранбената единица идентификувала невообичаено движење во Појасот Газа, што предизвикало телефонски повици меѓу високи функционери доцна во ноќта, но знаците во голема мера биле отфрлени.

Сепак, според извештаите на медиумите на хебрејски јазик, Бар отишол во седиштето на агенцијата и наредил распоредување на мал тим на границата на Појасот Газа во очекување на напад од мал обем.

Агенцијата наведува дека најмалку 10 членови на Шин Бет биле убиени при нападот на Хамас на 7 октомври.

„Во војна сме, а не во некоја рунда од борба. Војната завршува со одлучувачка победа и промена на ситуацијата. Нема граница и временско ограничување. До самиот крај“, додава Бар.