Претседателот на шпанската Ла Лига, Хавиер Тебас, откри дека организацијата што ја предводи води голема борба против илегалните емитери кои ги кршат ТВ правата.

Ла Лига веќе отстрани од „Гугл плеј“ и „Епл стор“, 58 апликации кои можат да се користат за гледање натпревари од шпанското првенство.

Исто така, лоцираше 46.000 спорни ИП адреси ширум светот преку кои незаконски може да се следат натпреварите од Примера и Сегунда.

На тие адреси, покрај натпреварите од шпанското првенство, може да се следат и други спортови, како формула, тенис, мото трки, но секако Тебас и организацијата што ја предводи најмногу ги интересира како да се справат со нелегалното емитување на „нивниот производ“.

Ла Лига има тим од дури 30 луѓе кои се посветени на пребарување на Интернет и „фаќање“ на такви „дифузери“ и засега таа борба дава резултати, но вистинската битка допрва следи.

„Елиминиравме 58 апликации за Андроид, кои беа преземени од над четири милиони луѓе ширум светот, од кои 800.000 во Шпанија. Таа апликација ви овозможува нелегално да гледате фудбал и други спортски настани. Во екосистемот на „Епл“, таа апликација беше преземена милион пати, од кои 300.000 во Шпанија“, вели Тебас.

Foto/ EPA