Во Полска се приведени двајца Руси кои дистрибуирале пропагандни материјали за групата „Вагнер“ низ полските градови, изјави министерот за внатрешни работи Мариуш Камински.

„Агенцијата за домашна безбедност идентификуваше и приведе двајца Руси кои дистрибуираа пропагандни материјали на групата „Вагнер“ во Краков и Варшава“, напиша Камински на платформата X.  Двајцата се обвинети, меѓу другото, за шпионажа и се уапсени.

Низ улиците на Краков се појавија повеќе постери со логото на руската приватна платеничка група „Вагнер“, јавија во саботата полските медиуми. Во последните неколку недели, руските платеници од групата „Вагнер“ се појавија на границата со Белорусија, што полскиот премиер Матеуш Моравјецки го прогласи за обид за дестабилизација на источното крило на НАТО.  Полското Министерство за одбрана најави испраќање дополнителни сили на овој дел од полската граница.