Повеќе од 230.000 војници се регрутирани во руската армија од почетокот на годината, изјави поранешниот претседател Дмитриј Медведев, додека руската офанзива во Украина продолжува во осумнаесеттиот месец.

„Од 1 јануари до 3 август (…) повеќе од 231.000 луѓе беа ангажирани според договорот“, рече Медведев.

Поранешниот руски претседател, кој моментално ја извршува функцијата заменик секретар на рускиот Совет за безбедност, во мај објави дека армијата регрутирала 120.000 луѓе во тоа време.

„Задачата е во иднина да се направи што е можно поатрактивна служба според договорот“, бидејќи на руската армија и се потребни регрути за да ја спроведе офанзивата во Украина.

Тој не кажа колку долго ќе трае обуката на новите регрути пред да влезат во единиците на фронтот кои од почетокот на јуни се обидуваат да ја запрат украинската контраофанзива на југот и на истокот на Украина.

Кампањата за регрутирање се спроведува преку социјалните мрежи и улични огласи кои промовираат воена служба и ветуваат исклучително атрактивни услови за идните војници.

„Заедно со платата и социјалните права, регрутите ги задржуваат своите цивилни работни места ‘за време на воената служба’, а сите заеми што можеби ги имаат се замрзнати“, рече Медвједев.

Во септември 2022 година, поради загубите на фронтот, руските власти мораа да прибегнат кон делумна мобилизација на резервните сили, при што беа мобилизирани најмалку 300.000 луѓе, а десетици илјади избегаа во странство.

На крајот на декември 2022 година, рускиот министер за одбрана Сергеј Шојгу оцени дека е „неопходно“ да се зголеми бројот на руски војници на 1,5 милиони – од кои „695.000 се под договор“ – што е повеќе од 1,15 милиони што рускиот претседател Владимир Путин ги планирал во август.