2 август 2023
1100.- Англискиот крал Вилијам Втори, синот на Вилијам Први Освојувачот, бил убиен со стрела додека ловел во шума.
1552.- На протестантите им била одобрена слободата на вероисповед во Германија.
1802.- Наполеон Бонапарта бил прогласен за „доживотен конзул“ на Франција, што му дало право да назначи наследник.
1830.- Францускиот крал Шарл Десетти Бурбонски бил принуден да абдицира под притисок на Јулската револуција.
1903.- Почнало Илинденското востание на македонскиот народ против османлиската власт, еден од најзначајните настани во историјата на македонскиот народ. За време на востанието се воделе битки кај селото Смилево, Демирхисарско, на Слива и на Мечкин Камен, Крушевско, кај Карабуница, Кичевско, кај селото Арменско, Леринско, во Рашанец и кај селото Чаништа, Мариовско.
1921.- Во Неапол умрел Енрико Карузо, италијански оперски пејач, тенор, еден од најголемите оперски пејачи на сите времиња. Настапувал на повеќе оперски сцени: во Милано, во Лондон и на други места. Автор е и на книгите „Спомени“ и „Методи на пеење“. Роден бил во Неапол, на 27 февруари 1873 година.
1940.- Во Прилеп по повод годишнината од Илинденското востание бил организиран масовен излет во месноста „Шаторов камен“. По враќањето од излет биле изведени демонстрации во градот, со пароли против војната, за мир и за слобода.
1944.- Во манастирот „Свети Прохор Пчински“ кај Куманово, во присуство на 122 претставници на македонскиот народ било одржано Првото заседание на Антифашистичкото собрание на народното ослободување на Македонија (АСНОМ). На заседанието, во согласност со одлуките на АВНОЈ, била потврдена општествено-правната положба на Македонија како рамноправна федерална држава во рамките на ДФ Југославија. Притоа, АСНОМ било конституирано како највисок законодавен и извршен орган на народната власт на македонскиот народ, а македонскиот јазик бил воведен како службен јазик во Македонија.
1945.- Умрел Пјетро Маскањи, италијански композитор и диригент. Роден бил на 7 декември 1863 година.
1963.- Во Скопје умрел Ѓорѓи Абаџиев, македонски писател, историограф, публицист и сценарист. Негови најпознати дела се „Изгрев“, „Епопејата на Ножот„“, „Последната средба“, „Арамиско гнездо“, „Пустина“ и други. Роден бил во Дојран, на 7 октомври 1910 година.
1970.- Британските војници во Северна Ирска првпат употребиле гумени куршуми за смирување на нередите.
1988.- Во Скопје умрел Ѓорѓи Механџиски, македонски новинар и уредник во весникот „Нова Македонија“, поет и публицист. Еден е од основоположниците на културните манифестации „Гоцеви денови“ и „Песна за Гоце“. Роден бил во селото Ѕвегор, Делчевско, на 24 април 1942 година.
1991.- Во Скопје излегол првиот број на македонскиот дневен независен весник „Република“. Вториот број излегол на 8 септември 1991 година.
1999.- Во судар на два воза во источна Индија загинале најмалку 285 луѓе.
2000.- Во Скопје умрел академик проф. д-р Александар Христов, еден од најистакнатите македонски научници од областа на правните и историските науки. Одбраните трудови „Создавање на македонската држава 1878-1978“ во 1985 година ги издаде издавачката куќа „Мисла“ од Скопје. Роден бил во Неготино, на 27 јули 1914 година.
2007.- Две руски мини-подморници „Мир-1“ и „Мир-2“ во рамките на експедицијата „Арктик 2007“ биле спуштени на дното на Северниот леден океан – на Северниот пол на длабочина поголема од четири километри каде била поставена руска тробојка од титаниум.
2021.- Почина Слободан Трајковски, долгогодишен новинар, дипломиран правник и поранешен директор на Македонската радио телевизија. Трајковски беше именуван за генерален директор на МРТВ во јуни 1996. година, од страна на Собранието. Во телевизијата работеше од 1969. година. Во јуни 2010 година си замина од телевизијата. Слободан Трајковски мина 40 години во МРТВ. Во неговата богата професионална кариера е и функцијата Генерален конзул во Торонто.
2021.- На 91-годишна возраст во Скопје почина проф. д-р Љупчо Ајдински, редовен професор во пензија на Филозофскиот факултет при Универзитетот „Св. Кирил и Методиј“ во Скопје. Докторирал на Дефектолошкиот факултет во Белград. Професорот Ајдински големо внимание посветуваше на грижата, заштитата и третманот на лицата со попреченост во Република Македонија. Основоположник е на системот за институционална заштита и едукација на лицата со попреченост, а со тоа и на првиот организиран третман на овие лица. Основоположник е на Институт за дефектологија (1993 г.) при Филозофскиот факултет во Скопје. Активно учествуваше во основањето на Сојузите на слепи, глуви и на другите инвалидски организации, соопшти проф. д-р Ратко Дуев, декан на Филозофскиот факултет во Скопје. Автор е на многу научни трудови, публикации, учебници и монографии. После пензионирањето ја продолжи својата хумана активност во инвалидските организации, граѓанското здружение „Мајка Тереза“ и во Лајнсовиот клуб „Св. Пантелејмон“. Во 2010 година ја основа хуманитарна фондација „Професор д-р Љупчо Ајдински“, чија главна дејност е доделување награди на институции и лица со попреченост, како и стипендирање на ученици и студенти од областа на специјалната едукација и рехабилитација. За својата работа, професорот Ајдински беше одликуван со многу награди и признанија, меѓу кои: „11 Октомври“, „Св. Климент Охридски“, „Мајка Тереза“, „13-Ноември“, Милениумски медал на честа и други. Беше роден на 28 април 1930 година во Ново Село, Струмица.
2022.- На 60-годишна ворзаст почина ортопедскиот хирург д-р Тодор Ношпал. На последните локални избори во 2021 тој беше кандидат на Интегра за градоначалник на Скопје. Откако дипломирал на Медицинскиот факултет во Скопје, д-р Ношпал кариерата ја почна на Клиниката за ортопедски болести во Скопје каде до 2012 извршуваше и раководни функции, потоа работеше во неколку големи приватни клиники во земјава, а во 2020 отвори сопствена приватна пракса. Според неговата стручна биографија, извршил над 7.000 ортопедски оперативни интервенции од кои 80 отсто примарни имплантации и ревизии на ендопротези на колк и колено.
