Шефот на руската паравоена група, Вагнер Евгениј Пригожин, во аудио порака на Телеграм рече дека неговата група во моментов не регрутира борци, но дека тоа најверојатно ќе го направи во иднина.

„Денеска ги дефинираме нашите следни задачи, чии контури стануваат се појасни и појасни. Несомнено, тоа се задачи што ќе се извршуваат во име на моќната Русија“, рече тој во аудио пораката, а пренесува Гласот на Америка (ВоА).

Иднината на Вагнер и Пригожин е непозната откако тој водеше краток бунт против рускиот одбранбен естаблишмент кон крајот на јуни, а потоа, во договор со Кремљ, Пригожин и некои од борците заминаа за Белорусија.

Сепак, Пригожин присуствуваше на состанокот со рускиот претседател Владимир Путин пет дена по бунтот и беше фотографиран минатата недела во Санкт Петербург, каде Путин беше домаќин на африканските лидери.

Кремљ објави дека борците на Вагнер кои не учествувале во бунтот ќе можат да се приклучат на редовната армија и да потпишат договори со Министерството за одбрана.

Во аудио порака, Пригожин рече дека „за жал“ некои од неговите борци се преселиле во други „структури на моќ“, но дека тие бараат да се вратат.

„Се додека има доволно луѓе, не планираме нови вработувања. Сепак, ќе ви бидеме исклучително благодарни ако останете во контакт со нас и штом  Русија треба да создаде нова група која ќе може да ги заштити нејзините интереси, ние дефинитивно ќе започнеме со регрутирање“, рече Пригожин.

Од бунтот, некои од борците на Вагнер се преселиле во Белорусија и почнале да ја обучуваат нејзината војска.

Во коментарите објавени минатата недела, Пригожин рече дека Вагнер е подготвен дополнително да го зголеми своето присуство во Африка. Улогата на платениците во поддршката на владите во Мали и Централноафриканската Република ги загрижува западните претставници.

САД го карактеризираа Вагнер како криминална организација.

Пригожин вели дека работи во согласност со законите на земјите во кои работи.