Турските воздушни напади, кои, наводно, биле насочени кон цивилна болница во Ирак и убиле осум лица, биле предмет на формална тужба до Советот за човекови права на ОН.

Тоа е прв случај што е покренат поради турските воздушни напади врз народот Јазид во Ирак.

Во нападот извршен на 17 август 2021 година, уништена е клиниката „Шикенија“ во Синџар, осум лица загинаа, а повеќе од 20 се повредени, пишува лондонски „Гардијан“.

Четворица подносители на тужбата, преживеани или сведоци на воздушните напади, велат дека е прекршено нивното основно право на живот загарантирано со меѓународното право и членот 6 од Меѓународниот договор за граѓански и политички права.

Подносителите на барањето наведуваат дека Турција не го истражила убиството на цивилите во воздушните напади и не им обезбедила на жртвите ефикасни правни лекови, што претставува кршење на нивните права за брза, независна и ефикасна истрага, што е предвидено во Меѓународниот договор за граѓански и политички права.

Жалбата е поднесена на крајот на минатата недела, а беа потребни две години да се подготви и да се стави на дневен ред.