Екстремните климатски катастрофи се предупредување на природата дека е неопходна промена на животниот стил за да се запре натамошното затоплување на планетата, се вели во коментарот на Светската организација за заштита на природата WWF Adria за големото невреме што ја погоди Хрватска и регионот.

– Невиденото невреме кое го погоди регионот, однесе многу животи и предизвика огромни штети, е предупредување за природни катастрофи кои можеме да ги очекуваме се почесто. Последиците од глобалното затоплување се присутни овде и сега. Науката и професијата долго време предупредуваат за нив, но сè уште нема вистински и систематски одговор, посочува WWF Adria во соопштението за медиумите.

Неодамна тесно и едвај изгласаниот Закон за обнова на природата во Европскиот парламент покажа дека сè уште нема добра волја и подготвеност кај одлучувачите и економијата за трансформација и декарбонизација, кои се неопходни доколку сакаме да ги зачуваме малкуте природни ресурси што ни останале, а со тоа и целата планета за нашите потомци, се вели во документот.

– Законот за обновување на природата, иако еден од клучните делови на Зелениот договор на Европската унија, едвај беше изгласан поради силната кампања на дезинформации од страна на конзервативните и десничарските политичари и одредени економски лобија, тврди WWF.

Тие велат дека ЕУ се заснова на компромис за интересите на нејзините земји-членки, но со природата и итната потреба за решавање на климатската криза и губењето на биолошката разновидност – не треба да има компромис.

– Колку човечки животи треба да се изгубат и која е цената на материјалната штета што сме спремни да ја платиме пред да сфатиме дека мора да престанеме со натамошното затоплување на планетата, да започнеме сериозна декарбонизација на општеството, да ја заштитиме природата и нејзините живеалишта и дека во таа трансформација сите треба да учествуваме подеднакво, праша извршната директорка на WWF Адрија Наташа Калауз.

Наместо тоа, предупредува Калауз, се зголемија инвестициите во фосилните индустрии додека ние се гушиме во пластика, која наскоро во морињата ќе има повеќе од рибите.

– Мораме драматично да ја намалиме зависноста од фосилните горива кои ја загадуваат животната средина и да се префрлиме на обновливи извори на енергија со многу побрзо темпо. Мора да го промениме начинот на кој добиваме енергија, како патуваме, колку ресурси трошиме, како произведуваме храна и што јадеме, истакна Калауз.

Таа вели дека е неопходна декарбонизација на економијата, како и транзиција кон циркуларна економија во која не доминира гладта за континуиран раст, која троши ограничени ресурси.

– Сите наши напори треба да бидат насочени кон транзиција кон одржлива економија и живеење во хармонија со природата, заклучи Калауз.