Во Србија деновиве излезе од печат избор од поезијата на Веле Смилевски под наслов „Песната палимпсест“. Издавач на книгата е „Арка“ од Смедерево, а составувач на изборот и автор на препевот е академик Ристо Василевски. Во толкувачкиот оддел објавен е есеј за творештвото на Смилевски под наслов „Новиот истражувачки дух во поезијата“ од академик Георги Старделов.

Како што информираат од Здружението за уметност и култура на живеење „Дијалог“, изборот поезија е објавен во паралелен превод на македонски и српски јазик. Презентирани се циклуси од стихозбирките на Веле Смилевски објавени по 2000 година: „Педесет песни“, „Педесет допевања“, „Час по поезија“, „Забранета книга“, „Европа го зборува мојот мајчин јазик“ и поемата „Век за самување“.

Веле Смилевски е добитник на највисоките признанија за поезија: наградите „Браќа Миладиновци“ на Струшките вечери на поезијата“ и „Ацо Шопов“ на Друштвото на писателите на Македонија. Носител е на државната награда „11 Октомври“ за животно дело во областа на уметноста.