НАТО ќе има повеќе од 300.000 војници во висок степен на готовност, потпомогнати со значителни воздушни и поморски капацитети, за да ја бранат секоја педа од сојузничката територија од каква било закана, изјави денеска генералниот секретар на НАТО, Јенс Столтенберг по дводневниот состанок во Брисел на министрите за одбрана на земјите-членки.

Министрите, посочи тој, денеска ги разгледаа нашите нови регионални планови.

„За прв пат од крајот на Студената војна во целост ја поврзуваме нашата колективна одбрана, планирањето на нашите сили, нашите способности и команда и контрола“, рече Столтенберг.

Тој истакна дека министрите на состанокот разговарале за регионалните планови и дека се поблиску до нивно усогласување.

„Иако денеска не се официјално одобрени регионалните планови, очекуваме овие планови да бидат резултат на самитот во Вилнус во јули. Договорот за одбранбениот план не беше постигнат, бидејќи Турција ја блокираше одлуката за формулирање на географски локации, од кои некои се поврзани со Кипар, изјави висок американски официјален претставник, кој сакаше да остане анонимен, пренесува Би-Би-Си.

Дипломатот додаде дека се уште постои можност да се најде решение пред самитот на НАТО во средината на јули во Вилнус.