При одење на море со бебе значително се менуваат приоритетите при изборот на дестинација, но и работите што влегуваат  во куферот.
На што треба да обрнете посебно внимание и кои лекови треба да ги носите?

Близина до дестинацијата

Колку е помладо детето, толку е пократко патувањето. Исто така, условите во предвиденото место за престој треба да бидат исти, слични или подобри од вашиот дом и да ви овозможат да ја следите вашата вообичаена дневна рутина. Внимавајте каква е плажата, дали има природна сенка, бидејќи децата до една година не треба директно да се изложуваат на сонце.

Не се препорачува да се оди на места каде што не е можно да се обезбеди здравствена заштита. Задолжително осигурете се пред поаѓање доколку одите во странство и навреме извадете го пасошот! Ако имате постаро дете, проверете дали пасошот не е истечен.

Транспортни средства

Доколку се работи за подолго патување, се препорачува користење авионски превоз, а за поблиски дестинации се препорачува автомобил со задолжителна клима и седиште во автомобил. Предноста на автомобилот е тоа што можете да земете многу повеќе работи отколку кога патувате со други превозни средства. Паузите треба да се прават на секои два часа и да се проветрува автомобилот.

Доколку има потреба од користење на клима уредот, студениот воздух не смее да дува директно врз детето. Пред да тргнете, треба да го исклучите клима уредот и да го отворите прозорецот за да ја изедначите температурата внатре со надворешната за да избегнете температурен шок и колапс при излегување од автомобилот.

Не заборавајте да понесете играчки за да го забавувате вашето дете за време на патувањето, како и рачен фрижидер за да можете да го разладите и складирате храната за вашето бебе доколку премине на диета без млечни производи.

Не се препорачува автобуски превоз, особено имајќи ја предвид епидемиолошката состојба. Возот е добро решение ако се обезбедени вагони за спиење или ако патувате со малку поголеми деца.

Кога е најдобро време да се оди на патување?

Јуни и септември се најпогодни за одмор, најмалку се преполни и не се премногу топли. Дури и ако одите во тие месеци, не го изложувајте бебето на директна сончева светлина, особено во потоплиот дел од денот.

Доколку одите на море некаде посеверно, патувањето во септември не е најдобрата опција поради ветрот и дождот кои се вообичаени во тоа време, па затоа е подобро да патувате појужно.

Како да се заштитите од сонцето

Гардеробата која детето ја носи треба да биде од природни материјали, задолжителна е капа на главата, како и очила за сонце со УВ заштита. Не треба да останете надвор од 10 до 17 часот бидејќи тогаш чадорот и крошните на дрвото не се доволна заштита.

Играњето во вода е дозволено само во тесна прегратка на мама или тато, неколку минути, под услов водата да биде топла. Можно е да се разладите во мал базен, под постојан надзор на родителите.

По излегувањето од водата (без разлика дали е море или базен), потребно е да се измие кожата на бебето со обична вода. Децата до шест месеци не треба да се мачкаат со заштитни креми, а по шест месеци со заштитен фактор 50+ на секои два часа.

Што да се земе од лекови

Патничката аптека треба да содржи термометар, сируп за намалување на температурата на база на парацетамол или ибупрофен (може да се користат и супозитории за намалување на температурата), пробиотик, електролити, крем за ублажување на проблемите по каснување од инсекти (обично комарци), солен раствор или препарат на база на на прочистена морска вода за чистење на затнат нос, аспиратор за чистење на носот (ако е бебе), средство за дезинфекција, фластер, завој, стерилна газа.

За деца кои се склони кон алергии, антиалергиски сируп и крема за локална употреба како што е препорачано од педијатарот. За деца кои имаат хронични заболувања или се склони на разни инфекции, треба да понесете лекови пропишани од педијатарот и последен лекарски извештај.

Ако детето се разболи за време на патувањето, задолжително контактирајте со лекар.

Задолжително е да му се даде на бебето пробиотик.

Најмалку пет дена пред поаѓање треба да започнете да земате пробиотици и да продолжите да ги земате за време на престојот, за да избегнете стомачни инфекции. За време на одморот не се препорачува промена на исхраната и воведување нова храна.