Со договор вреден околу 860.000 евра се обезбедуваат резервни делови, материјали и нивно монтирање за санација на жичарата на Водно. Договорот го склучиле ЈСП „Скопје“ и скопската подружница на австрискиот производител „Допелмаер“ во септември, по постапка за преговарање.

Зафатот опфаќа замена на потребните делови и темелна реконструкција на кабините. Сите кабини се спуштени од жичницата за да се работи на нивната обнова. Моторот е на репарирање во странство и се очекува да биде вратен и монтиран. Активностите ги изведуваат екипи на производителот.

Градоначалникот Орце Ѓорѓиевски и директорот на ЈСП извршија увид на терен. Според најавите, работите се одвиваат со засилен интензитет, со очекување реконструкцијата да заврши до средината на декември.

Од ЈСП нагласуваат дека рокот зависи од текот на техничките активности. Жичарата ќе биде вратена во употреба по потребните безбедносни проверки и тестирања, а јавноста дополнително ќе биде известена за точниот датум.

Жичницата е затворена од 25 април годинава. Иако првично било најавено дводневно запирање, проверките на стручниот тим од „Допелмаер“ покажале сериозни недостатоци, поради што градските власти одлучиле да не ја пуштаат повторно во сообраќај.

Според Ѓорѓиевски, состојбата е последица на нередовно одржување и неспроведување на неопходните големи сервиси од претходните раководства. Тој тврди дека потребниот темелен зафат бил занемаруван речиси една деценија.

Градоначалникот ја поставува безбедноста како услов за повторното отворање. Со обновата, Град Скопје и ЈСП настојуваат да обезбедат сигурно возење до Милениумскиот крст и повторно да им го приближат Водно на скопјани и гостите на градот.