Федерален суд во Флорида нареди психијатриска проценка за Томас Маркл, таткото на Меган Маркл, британската војвотка од Сасекс. Целта на оваа проценка е да се утврди дали тој е ментално способен да се соочи со обвиненијата за поседување детска порнографија.
Судијката Линдзи Грифин од Тампа во судски налог наведе дека првичното појавување пред судот на 82-годишниот свекор на принцот Хари отворило прашања во врска со неговата способност да учествува во кривична постапка. Томас Маркл беше уапсен во петокот под федерално обвинение за поседување материјали што прикажуваат сексуална злоупотреба на деца.
Меѓу пронајдените материјали имало две експлицитни фотографии на кои тој позира со голо девојче, како и други слики на кои е прикажан со деца во различна фази од разголување. На една од фотографиите се гледа голо девојче во просторија што наликува на оние во еден ланец мотели на Филипините, каде што Маркл претходно престојувал одреден период.
Судот нареди психијатриска проценка
Според изјавата на ФБИ, приложена кон кривичната пријава против Маркл, федералните агенти го заплениле предметниот материјал од магацински простории што Маркл ги изнајмувал во Лос Анџелес уште од 2008 година. Меѓу запленетите предмети имало фотографски слајдови, филмски негативи и книги.
Коментирајќи го случајот, директорот на ФБИ, Каш Пател, изјави дека Маркл земал на нишан невини деца, обидувајќи се да им ја украде невиноста преку своите криминални дејствија. За време на рочиштето во петокот, Маркл не се изјасни за вината. Судот одобри негово пуштање од притвор врз основа на дадена лична гаранција, при што тој ќе биде во домашен притвор и под електронски надзор.
Во наредбата издадена по рочиштето, судијата Грифин наведе дека постои основано сомневање оти Маркл можеби боледува од ментално заболување поради кое е ментално неспособен – до тој степен што не е во состојба да ја разбере природата и последиците од постапката што се води против него, ниту пак ефикасно да учествува во сопствената одбрана.
Судијата Грифин објасни дека овој заклучок се заснова на информации за неговата здравствена состојба (чии детали не беа обелоденети), како и на неговата длабока старост и нарушувања на помнењето. Судот ја назначи форензичкиот психијатар Ејми Геродимос да изврши независна психијатриска проценка на Маркл, да ја процени неговата здравствена состојба и да утврди дали тој е ментално способен да му се суди. Судијата наложи д-р Геродимос да го достави својот извештај до судот најдоцна до 20 ноември.
