Поранешниот американски претседател Барак Обама упати остри критики кон Доналд Трамп на предизборен собир на демократите во Кливленд, десет дена пред изборите за американскиот Конгрес. Особено внимание привлече неговата шега за преуредувањето на Белата куќа, во која доминираат златни украси и позлатени детали.
„Белата куќа изгледа како Садам Хусеин да отворил ресторан „Чизкејк фектори“. Злато има насекаде“, рече Обама, предизвикувајќи смеа кај присутните.
Трамп во текот на вториот претседателски мандат значително го промени изгледот на Овалната соба и другите делови од Белата куќа, додавајќи бројни златни украси, орнаменти и позлатени елементи. Тој повеќепати јавно зборуваше за реновирањето, нагласувајќи дека Белата куќа, како симбол на САД, мора да изгледа впечатливо.
„По две години хаос – доста е“
Обама во Кливленд настапи заедно со поранешниот демократски сенатор Шерод Браун, кој се обидува повторно да освои место во Сенатот, и со демократската кандидатка за гувернерка на Охајо, Ејми Актон.
„За десет дена имате можност, по две години хаос, суровост, корупција и неспособност, да кажете: доста е“, порача Обама.
Тој ја критикуваше администрацијата на Трамп и за војната со Иран, како и за работата на министерот за одбрана Пит Хегсет.
„Колку време мислите дека овој министер за одбрана поминува гледајќи се во огледало?“, праша Обама, додавајќи дека станува збор за луѓе кои не се однесуваат сериозно, а последиците од нивните одлуки ги плаќаат граѓаните.
Поранешниот претседател ги поврза политиката на Трамп кон Иран и царинските мерки со зголемувањето на трошоците за живот, една од главните теми во предизборната кампања.
Обама во завршницата на кампањата на демократите
Обама во последните недели сè поактивно се вклучува во кампањата на демократите. По собирот во Кливленд, планирано е да настапи и во Детроит со демократскиот кандидат за Сенат Абдул Ел-Сајед, а следната недела и во Џорџија, заедно со сенаторот Џон Ософ и кандидатката за гувернерка Кеиша Ленс Ботомс.
Тој претходно предупреди дека трката во Охајо е исклучително неизвесна и дека резултатот во оваа сојузна држава би можел да биде пресуден за контролата врз Сенатот.
Охајо во последните години забележително се придвижи кон републиканците, а Трамп убедливо победи таму на претседателските избори во 2024 година. Обама, пак, ја освои државата на двата свои претседателски изборни циклуса, во 2008 и 2012 година.
Демократите сега се надеваат дека незадоволството на граѓаните поради трошоците за живот и политиките на Трамп повторно ќе ја направи државата конкурентна во изборната трка.
