Гугл ќе инвестира најмалку 13 милијарди евра во инфраструктура за вештачка интелигенција во Финска во следните две години. Компанијата потврди дека ова е нејзината најголема поединечна инвестиција во Европа, објави Ројтерс.

Стратешки избор на локација
Финска стана исклучително привлечна локација за дата центри. Компании како што се Мајкрософт и БајтДенс, сопственикот на ТикТок, се обидуваат да ги намалат трошоците за енергија и да ги исполнат климатските цели таму. Студената клима овозможува поевтино ладење на системите, а земјата има и големи количини електрична енергија со ниска емисија на јаглерод.

Инвестицијата е дел од поширока стратегија, бидејќи Алфабет оваа година ги зголеми своите глобални инвестиции на помеѓу 195 и 205 милијарди долари за да ја задоволи растечката побарувачка за компјутерска моќ.

Опсег на проектот и економско влијание
Инвестицијата, која ќе се реализира во текот на 2027 и 2028 година, ќе вклучува изградба на центри за податоци, подобрување на електричната мрежа и проекти за чиста енергија и системи за батерии. Google соопшти дека ресурсите ќе напојуваат услуги како што се Gemini, Search, Maps и YouTube.

„Новата дигитална инфраструктура ќе служи како основа за дигитална подготвеност, иновации и развој на вештачка интелигенција во Финска, но и низ цела Европа“, соопшти компанијата.

Гугл проценува дека проектот ќе придонесе со околу 3,6 милијарди долари во бруто-домашниот производ на Финска за време на фазата на изградба, додека откако системот ќе биде оперативен, ќе поддржува околу 7.000 работни места годишно.

Финскиот премиер Петери Орпо коментираше дека одлуката на Гугл е „јасен доказ за нашите силни страни“. Тој додаде дека вредноста на економијата на податоци оди подалеку од директните инвестиции, бидејќи ги стимулира иновациите, истражувањето и развојот.