Членката на НАТО, Финска, ја заврши изградбата на ограда долга 200 километри долж границата со Русија по две години работа, објавија денес финските власти. „Најважната задача на една држава е да ја обезбеди безбедноста на своите граѓани“, изјави финската министерка за внатрешни работи, Мари Рантанен.

„Во овие непредвидливи времиња, оградата на источната граница е клучна компонента на ефикасен систем за безбедност на границите“, додаде таа. Изградбата започна во август 2024 година долж делови од финско-руската граница, која вкупно изнесува повеќе од 1.300 километри, на места каде што финската гранична стража процени дека „оперативната потреба била најголема, а изградбата била економски најисплатлива“.

Бариерата се состои од ограда висока околу 4,5 метри и систем за технички надзор. Тензиите по должината на финско-руската граница нагло се зголемија откако Русија ја започна инвазијата на Украина во 2022 година.

„Без гранична ограда, не е можно да се бориме против злоупотребата на миграцијата“
Финска ги затвори своите копнени гранични премини со Русија во декември 2023 година, откако ја обвини Москва за намерно насочување на мигрантите кон границата со цел дестабилизација на земјата.

Русија ги негира обвинувањата. „Без гранична ограда, не е можно ефикасно, веродостојно и безбедно да се бориме против оваа злоупотреба на миграцијата“, рече Марку Хасинен од финската гранична стража.