Судот одлучи дека Тајлер Робинсон, обвинет за убиство на американскиот конзервативен активист Чарли Кирк на универзитетски кампус во Јута минатата година, може да биде суден за убиство, за што му се заканува смртна казна, објави Ројтерс. Судијата на Окружниот суд во Јута, Тони Граф, ја донесе одлуката откако обвинителите презентираа, според нив, „убедливи“ докази дека Робинсон, 23, треба да биде суден за убиство, со можност за изрекување смртна казна.
Обвинителите на Јута го обвинуваат Робинсон дека испукал еден истрел што го убил 31-годишниот Кирк, додека учествувал во една од неговите препознатливи дебати на универзитетскиот кампус. Робинсон е обвинет по седум точки, вклучувајќи и тешко убиство. Обвинителите велат дека тој, исто така, ги загрозил животите на другите на настанот со пукање. Злосторството повлекува смртна казна во Јута.
„Нема докази дека некој друг бил во опасност“
Адвокатот на одбраната, Стејси Висер, тврдеше дека пукањето не загрозило никого освен Кирк и затоа не се квалификува како тешко убиство. Таа нагласи дека вооружениот човек не пукал во никого друг, ниту го наполнил оружјето, туку испукал еден истрел и избегал.
„Има еден чин. Еден истрел. Еден куршум. Една жртва“, изјави Висер пред судот. „Немаше докази што укажуваат дека некој друг бил во опасност“, додаде таа.
За време на сослушувањето, обвинителството се осврна и на резултатите од ДНК-анализата, според кои ДНК-та на Робинсон е пронајдена на оружјето за кое се сомнева дека е употребено во убиството. Сепак, адвокатот на одбраната, Мајкл Берт, ја доведе во прашање веродостојноста на тој наод.
Мотив зад убиството
Обвинителот Рајан Мекбрајд тврди дека Робинсон, кој бил во врска со својот поранешен партнер Ленс Твигс, го нападнал Кирк поради неговите политички ставови за истополовите бракови и трансродовите права. Таквиот мотив би можел дополнително да го поткрепи барањето на обвинителството за смртна казна.
Мекбрајд цитираше СМС-порака во која Робинсон наводно му кажал на Твигс дека пукал во Кирк затоа што „некои видови омраза не можат да се решат преку преговори“. Адвокатот на одбраната, Ричард Новак, рече дека не е јасно што Робинсон мислел под „омраза“ и дека пораката не укажува дека тој се спротивставува на политичките ставови на Кирк.
Формално сослушување за изјаснување ќе следи по одлуката на судот дека постојат доволно основи за продолжување на случајот. Робинсон сè уште не се изјаснил.
Патем, Кирк беше коосновач на конзервативната младинска организација Turning Point USA и му се припишува важна улога во мобилизирањето на младите гласачи во кампањата на Доналд Трамп за претседателските избори во 2024 година.
