Српскиот претседател Александар Вучиќ денес ги отфрли тврдењата на претседателот на Демократската партија (ДС) Срѓан Миливојевиќ дека ќе ја напушти Србија ако ги изгуби изборите.

За време на посетата на винаријата Цветковиќ во Стањево во близина на Александровац, Вучиќ рече дека нема причина да избега од земјата и ги пофали резултатите од неговата влада, јавуваат српските медиуми.

„Велеа дека ќе избегам, дека ќе се сокријам. Зошто да бегам, бидејќи ја изградив Србија, заедно со други луѓе, на начин што никој во нејзината историја никогаш не изградил, дека го изградив Белград на начин што никој никогаш не го изградил“, рече Вучиќ.

Тој додаде дека е штета што Демократската партија, која ја опиша како некогаш голема партија со бројни интелектуалци, денес е сведена на луѓе како Миливојевиќ.

Тој оцени дека опозицијата однапред знае каков ќе биде резултатот од изборите и затоа, како што тврди, „се жали“.

„Секој затвор во Србија ми е поубав од сонцето на кое било друго место во светот. Немам ништо никаде, ниту куќа, ниту вила, ниту ништо, ниту пари, ниту отворени сметки. Ме интересира само мојата Србија, во неа сум роден, во неа ќе умрам, борејќи се за неа“, рече Вучиќ.

За време на посетата на Расинскиот округ, Вучиќ се осврна и на положбата на Србите на Косово. Тој рече дека Србија ќе ги употреби сите дипломатски и мирни средства за да го заштити српското население.

„Гледаме да се бориме со сите дипломатски и мирни средства за да го зачуваме нашето население. Во овој момент не ни е потребен конфликт со НАТО, но нема да дозволиме погром и протерување на нашето население“, рече Вучиќ.

фото/Depositphotos