Њујоршката полиција истражува напад со нож во кој вчера на Менхетен беа повредени двајца мажи – еден со азиско, а другиот со еврејско потекло – откако сведоци и жртвите изјавиле дека напаѓачот за време на нападот извикувал „Алаху акбар“.

Полицијата го уапси 51-годишниот Раул Моралес, а мотивот за нападот сѐ уште се истражува. Според првичните информации, можно е психичката состојба на осомничениот да имала значајна улога во инцидентот.



Повредените, мажи на возраст од 57 и 50 години, се здобиле со повеќекратни убодни рани и се хоспитализирани во стабилна состојба. Полицијата соопшти дека нападот бил непредизвикан и дека засега нема докази за поврзаност меѓу осомничениот и жртвите.

Градоначалникот на Њујорк, Зохран Мамдани, го осуди нападот и порача дека „на вакви дела на омраза и насилство нема место во нашиот град“, додека истрагата за мотивот продолжува.