Министерот Панче Тошковски јавно изјави дека полицијата поседува софтвер кој овозможува пристап до камерите и микрофоните на телефоните на сите граѓани на Македонија. Тој систем се вика Pegasus, шпионски софтвер (spyware) кој го разви израелската компанија NSO Group, изјави Петар Огњеновиќ – член на Извршниот одбор на СДСМ.

Тој вели дека системот може да се инсталира далечински, без кликање на телефонот, да пристапи до сите пораки, фотографии, локација, камера, микрофон, контакти и апликации.

„Се користи за таен и тотален надзор. NSO Group го продава на влади под изговор на борба против тероризам и криминал, но масовно се злоупотребува против новинари, активисти, опозиција и критичари на властите низ целиот свет. После Black Cube, приватниот Мосад, за тајно снимање, следење и фабрикување афери Мицкоски и ВМРО-OKG одат чекор понатаму: воведуваат државен шпионски софтвер против сопствените граѓани. Големиот пријател на Мицкоски од сестринската партија СНС – Александар Вучиќ и неговиот режим купиле Pegasus и слични израелски алатки. За тоа опширно пишувале: Amnesty International, BIRN (Balkan Investigative Reporting Network), Citizen Lab, Access Now, Share Foundation, Haaretz, The Guardian, Washington Post и други. Во Србија Pegasus бил користен против новинари, активисти и критичари на власта“, рече тој.

Според Огњеновиќ, ваквата практика е директно кршење на Уставот, Европската конвенција за човекови права и европските стандарди.

„Јавно бараме веднаш да се обелодени кој го купил Pegasus, колку чини и против кого се користи, независна истрага за злоупотребата на софтверот од страна на МВР и оставка од Панче Тошковски. Демократијата не е компатибилна со Pegasus“, рече тој.