Цистерна со бензин се запалила во Тексас по судир со друго возило и уривање на далековод, а возачот е во критична состојба, соопштија локалните власти, пренесе Ен-Би-Си Њуз.

Несреќата се случила околу 1 часот по локално време. Камионот превезувал околу 9000 галони бензин, кој почнал да истекува откако цистерната излетала од патот во близина на бензинска пумпа.

Според пожарникарите, пожарот бил предизвикан од срушени електрични водови. Возачот се обидел да спречи истекување на горивото кон паркингот на бензинската пумпа, но бил пренесен во болница со изгореници. Други повредени нема.

Пожарникарските екипи интервенирале неколку часа, ладејќи ја цистерната со вода и користејќи песок за да го запрат истекувањето. Интервенцијата завршила околу 7 часот наутро.

Сведок изјавил дека слушнал силна експлозија, по што пожарот брзо се проширил, а топлината се чувствувала и од далечина.

Фото: Depositphotos