Жителите на населбата Лисиче упатуваат јавен апел до надлежните служби во Општината поради повеќегодишниот проблем со нефункционалното улично осветлување. Иако проблемот е пријавуван повеќепати преку официјални дописи, мејлови и телефонски јавувања, реакција од надлежните сè уште нема.

​Најкритична е точката каде што завршува булеварот „12. македонска бригада“ кон Горно Лисиче, како и повеќе споредни улици. Посебен страв кај родителите предизвикува мракот на улицата „Ѓорѓе Андреевиќ Кун“, која е главната траса по која децата секојдневно се движат до основното училиште „Димитар Македонски“.

​„Ги исцрпивме сите официјални патишта за комуникација, но одговор не добивме. Во овој период од годината, кога деновите се кратки, а улиците се празни и небезбедни, нашите деца се изложени на огромен ризик,“ велат загрижените жители.

​Покрај слабата видливост, дополнителна опасност претставуваат и чопорите кучиња кои често се собираат токму на неосветлените локации и претставуваат закана за пешаците. Жителите стравуваат дека темните улици се и „поволен терен“ за кражби и сообраќајни незгоди.

​Тие јавно прашуваат: „Дали треба да се случи некој сериозен инцидент за некој конечно да преземе мерки за решавање на овој долгогодишен дефект?“

​Како доказ за алармантната состојба, локалното население доставува и видеоматеријали и фотографии, со надеж дека јавниот притисок конечно ќе ги натера надлежните да ја извршат својата обврска.

Фотографии од улиците 12та Македонска Бригада кон Горно Лисиче и Ѓорѓе Андреевиќ Кун