Заменик-министерот за образование Петар Атанасов поднесе оставка


Заменик-министерот за образование и наука Петар Атанасов на својот фејсбук-профил во отворено писмо до премиеот Зоран Заев и до јавноста соопшти дека поднесува оставка од функцијата. Како што вели, неговата позиција станува „неодржлива и неефективна“ и дека „промените во образованието кои ги навестувавме, не ги остваруваме“.

– Ова ви го соопштив уште пред реконструкцијата, но еве сега може и да се процесуира. Едноставно, мојата позиција станува неодржлива и неефективна. Истовремено, давам оставка и на сите дополнителни функции во рамките на Министерството за образование и во Владата која Вие ја предводите. Во изминатите неполни 10 месеци, со големо задоволство и верба ја прифатив поканата да ја извршувам оваа функција. Влегов во систем кој со години не само што не се менувал, туку и многу назадувал и еродирал. Освен многуте и бескрајни формалности во работата на Министерството, овој период не се случи ништо позначајно. И тоа што навидум се тркала е далеку од потребите на системот и не ги менува севкупните состојби. Промените во образованието кои ги навестувавме, не ги остваруваме. Зошто е ова вака, веројатно Вие најдобро знаете! Пред само една недела во еден јавен настап кажав дека треба да се запали црвеното светло и дека ако продолжиме со ова темпо, може да очекуваме образованието да го реформираме за 10 до 15 години. А можевме многу, многу, подобро, пишува Атанасов во отвореното писмо.

Посочува дека уште од самиот почеток не му било дозволено да формира тим со што ефектите од неговата работа, како што вели, би биле многу поголеми, а предлозите што ги имал (меѓу кои и за Филмскиот институт во Охрид) останале во кабинетот на министерот или во кабинетот на премиерот или се нереализирани поради инертноста и спороста на образовните институции.

Без суштински и доброосмислени и реализирани промени во образованието, наведува Атанасов, „корен не може да фати“ ниту Националната стратегија за едно општество и интеркултурализам на чија подготовка се посветил во изминатите десет месеци.

-Моја намера и лична желба е да се вратам на академската кариера, затоа што револуцијата што ја покренавме почна да ги јаде сопствените деца. Годинава навршувам 30 години професионална работа и професионални ангажмани во неколку клучни и различни сектори, исполнети со потраги по нови предизвици. За жал, моите очекувања дека преку политичкиот ангажман во изминатите шест години ќе влијаам во насока на реално подобрување на состојбите во општеството, особено во образованието и несебичното вложување за таа цел, не се остварија. Се чини дека иако декларативно сите говорат дека се залагаме да ги задржиме младите во државата, без вистинска реформа и поквалитетно образование, како и можност за поголем просперитет за младите, тоа нема да се случува. До некој следен предизвик!, напиша  Петар Атанасов.

Атанасов има  докторирано социолошки науки на Институтот за социолошки и политичко-правни истражувања на тема „Мултикултурализмот како идеја, теорија и практика“. На функцијата заменик-министер во МОН дојде откако во 2016 година беше избран за пратеник во Собранието,  каде што ја водеше и Комисијата за образование, наука и спорт. 

Вести

Потешко повредената патничка во сообраќајката во Србија останува во болница, останатите пуштени дома пуштени

Сите патници од сообраќајната несреќа што се случи утринава на патот Блаце – Белољин во Србија, во која автобус со македонски регистарски таблички се превртел од патот, а беа згрижени во болницата во Прокупље се […]

Балкан

Рајанер“ ги укинува летовите кон градовите од поранешна СФРЈ

Нискобуџетниот авиопревозник „Рајанер“ ќе ги прекине своите редовни летови од аеродромот во Стокхолм кон Бања Лука, Ниш и Подгорица поради затворање на своите бази. Исто така, компанијата ги укинува и сезонските летови до Риека. Меѓутоа […]

Вести

Најтешко повредената патничка од сообраќајката во Србија префрлена во Ниш

Од 26-те повредени во сообраќајната несреќа што се случи утринава на патот Блаце – Белољин во Република Србија, во која автобус со македонски регистарски таблички се превртел носејќи патници на еднодневна екскурзија на Копаоник, во […]