Трамп го нарече Бајден глуп и побара извинување за анти-ваксерската реторика


Трамп го нарече Бајден глуп и побара извинување за анти-ваксерската реторика - МИА

Вашингтон, 8 септември 2020 () – Американскиот претседател, Доналд Трамп, кој од демократскиот противник, Џо Бајден, беше обвинет за загрозување на животите на Американците заради управувањето со корона кризата, својот политички и изборен ривал го нарече „глупав“ и побара да му се извини за наводната анти-ваксерска реторика.


 

Трамп, кој според анкетите заостанува зад Бајден во претседателската трка, остро ги нападна Бајден и неговиот кандидат за потпретседател, Камала Харис.

Трамп најави дека вакцината за коронавирус ќе биде подготвена за употреба во рекордно време, можеби пред изборите, покренувајќи го прашањето дали политичкиот притисок може да доведе до употреба на вакцината пред да се потврди дека е безбедна, пренесуваат британските медиуми.

Во врска со ова прашање Харис изјави дека нема да му верува на Трамп кога станува збор за вакцина пред изборите, додека Бајден, критикувајќи го одговорот на Трамп на коронската криза, ги повика Американците да ги слушаат научниците.

Критичарите го обвинуваат Трамп за нарушување на угледот на научниците за време на кризата.

Говорејќи на прес-конференција пред Белата куќа, Трамп рече дека Бајден и Камала Харис можат да ја уништат земјата и економијата и истакна дека треба веднаш да се извинат за реториката против вакцината.