Скандалот во Ватикан се продлабочува: Пронајдени пари и златници кај администратор



Тековните финансиски скандали во Ватикан не покажуваат знаци на попуштање откако полицијата откри стотици илјади евра во готово, заедно со скапоцени златници и медалјони скриени во два дома на суспендиран службеник на Ватикан, пренесува „Домани“.



Според извештајот на италијанскиот истражувачки новинар Емилијано Фитипалди, „пленот“ на поранешниот администратор во Ватикан, Фабрицио Тирабаси, вклучувал неколку килограми златни и сребрени монети, како и 600.000 евра во готово, од кои голем дел биле ставени во стара кутија за чевли.

Вкупната вредност на она што го заплени италијанската финансиска полиција е над два милиони евра, пишува Фитипалди, а „пленот“ бил поделен во куќата на поранешниот функционер во Ватикан и во магацин во сопственост на неговиот 90-годишен татко во градот Селано, во регионот Абруцо, Централна Италија.

Таткото на Тирабаси управувала со мала продавница за монети и поштенски марки во близина на Ватикан, што може да помогне во објаснувањето на огромната колекција вредни монети.

Фабрицио Тирабаси е сметководител кој работел за кардиналот Анџело Бечу во Државниот секретаријат на Ватикан се додека не беше суспендиран минатата година заедно со уште четворица вработени. Тирабаси беше поврзан за озлогласената набавка на недвижнини во вредност од милиони долари на Ватикан во луксузната населба Челзи во Лондон.

Тирабаси, наводно, му издал на Ватикан – и бил платен – околу 15 милиони евра лажни фактури , а меѓу неговите сметки има и една во самата Ватиканска Банка, на која има над милион евра.

Ватикан го истражува Тирабаси заедно со италијанските бизнисмени Рафаеле Минчоне и Џанлуиџи Торзи, како и поранешниот банкар од „Кредит Свис“ Енрико Красо, во врска со набавката на недвижнини во Лондон.

Минатиот декември, италијанскиот дневен весник „Кориере дела сера“ откри дека Ватикан вложил повеќе од милион долари за финансирање на филмот „Рокетман“, биографски филм на кантавторот Елтон Џон со експлицитни сцени на хомосексуален секс.

Државниот секретаријат на Ватикан исто така инвестирал во компанијата за очила и лајфстајл производи на Лапо Елкан, користејќи пари донирани од католичките верници преку светските акции „Питерс Пенс“.