Американското Министерство за внатрешни работи соопшти дека ќе ги откаже договорите за концесија за нафта и гас за федералниот резерват за диви животни што и беа доделени на Државната агенција за развој на Алјаска во последните денови од администрацијата на поранешниот претседател Доналд Трамп.

Републиканската администрација на Трамп и издаде на Администрацијата за индустриски развој и извоз на Алјаска (АИДЕА) седум договори за концесија во националниот резерват за диви животни на Арктикот, еден ден пред инаугурацијата на претседателот Џо Бајден, демократ кој вети дека ќе заштити 7,7 милиони хектари живеалиште за поларните мечки.

Екологистите и домородните групи на Алјаска го пофалија овој потег, додека републикански сенатор од Алјаска го осуди. Претставниците на АИДЕА не беа веднаш достапни за коментар.

Министерството најави и дека ќе заштити околу пет милиони хектари во северниот дел на државата.

„Бидејќи климатската криза го загрева Арктикот повеќе од двојно побрзо од остатокот од светот, ние имаме одговорност да ја заштитиме оваа скапоцена област“, ​​рече Бајден во изјавата.

„Поништувањето на сите преостанати договори за концесија за нафта и гас издадени во текот на претходната администрација и заштитата на повеќе од пет милиони хектари на Западниот Арктик ќе помогне да се зачува нашата арктичка земја и дивиот свет, истовремено почитувајќи ја културата, историјата и трајната мудрост на домородците од Алјаска кои живееле во овие области“.

Потезите се најновите напори на Бајден за ограничување на активноста на нафта и гас на јавните површини, дел од пошироката агенда за борба против климатските промени.

Бајден, кој се подготвува за реизбор во 2024 година, најверојатно против Трамп, исто така се соочува со притисок да ги зголеми домашните резерви на гориво за да ги задржи цените на горивата ниски. Претходно оваа година, Министерството го одобри проектот за дупчење на „Конокофилипс“ од 7 милијарди долари во Алјаска, што предизвика критики од Обединетите нации, кои ги повикаа земјите-членки да ја забрзаат транзицијата од фосилните горива.

Производството на нафта во Алјаска се намали во последните три децении. Американската држава моментално произведува помалку од 500.000 барели сурова нафта дневно, што е пад во однос на повеќе од два милиони барели дневно во 1988 година, според владините податоци.