Русија рано утринава изврши комбиниран напад со беспилотни летала и ракети врз Украина, насочени главно кон јужните делови на регионот Одеса и погоди земјоделски објект, објавија украинските воздухопловни сили во порака на апликацијата Телеграм.

Русија лансираше шест беспилотни летала „Шахед“ од иранско производство и 10 крстосувачки ракети, а украинските сили уништија шест од беспилотните летала и шест проектили пред да ја погодат целта, соопшти воздухопловството.

Ситуацијата во Одеса и нејзините пристаништа беше внимателно следена на пазарите за жито, бидејќи Киев вчера објави дека два товарни брода пристигнале таму за да го користат привремениот коридор за да пловат до пристаништата на Црното Море и да товарат жито за африканските и азиските пазари.

Во одбивањето на воздушниот напад учествуваа борбени авиони, противвоздушни ракетни единици, мобилни вооружени групи и други средства, соопштија од воздухопловните сили. Гувернерот на Одеса, Олех Кипер, на Телеграм соопшти дека силос за жито и земјоделски полиња се оштетени во областа Березевски во источниот дел на регионот.

За среќа нема жртви, пишува Кипер. Целата територија на Украина неколку часа беше под готовност за воздушен напад. Украина минатиот месец објави „хуманитарен коридор“ во Црното Море за да ги ослободи бродовите заробени во нејзините пристаништа од почетокот на војната во февруари 2022 година и да ја заобиколи де факто блокадата откако Русија го отфрли договорот да му дозволи на Киев да извезува жито.