Рускиот претседател Владимир Путин денеска го предупреди Западот дека директен конфликт меѓу Русија и НАТО предводена од САД ќе значи дека светот е на работ на трета светска војна, но рече дека ретко кој сака такво сценарио.

Украинската војна ја предизвика најдлабоката криза во односите меѓу Москва и Западот од Кубанската ракетна криза во 1962 година. Путин често предупредуваше на ризиците од нуклеарна војна, но вели дека никогаш не почувствувал потреба да користи нуклеарно оружје во Украина.

Францускиот претседател Емануел Макрон минатиот месец изјави дека не може да ја исклучи можноста за распоредување на копнени сили во Украина во иднина, при што многу западни земји се дистанцираат од него, додека други, особено во Источна Европа, изразија поддршка.

На прашањето на Ројтерс за изјавите на Макрон и ризиците, односно можноста за конфликт меѓу Русија и НАТО, Путин одговори: „Во современиот свет се е можно“.

„На сите им е јасно дека ова ќе биде само еден чекор од целосна трета светска војна. Мислам дека ретко кого го интересира“, им рече Путин на новинарите по постигнувањето на најголемата победа во постсоветската руска историја.

Сепак, Путин додаде дека воениот персонал на НАТО е веќе присутен во Украина, велејќи дека Русија знае дека на бојното поле се зборува и англиски и француски.

„Таму нема ништо добро, пред се за нив, затоа што умираат таму, и тоа во голем број“, рече тој.

Повеќе од две години Украина се брани од Русија со помош на Западот.

Руската изборна комисија објави дека Путин постигнал рекорден резултат од нешто помалку од 88 отсто од гласовите, по речиси четвртина од гласачките ливчиња преброени. На претходните претседателски избори во 2018 година победи со 76,7 отсто од гласовите.